மாணாக்கர்கள் தமிழ்வழியே வேளாண் படிப்பை மேற்கொள்வதினால் பாடங்களை எளிமையாகவும், தெளிவாகவும், புரிதலோடும் உள்வாங்கிக் கொள்ள ஏதுவாகின்றது. இத்தகைய ஆழ்ந்த புரிதல், ஆக்கபூர்வமான சிந்தனைகளோடு  வேளாண் சார்ந்த புதிய கண்டுபிடிப்புகள் வருவதற்கான வாய்ப்புகளை அதிகரிக்கிறது.

விரிவாக்ககல்வி மூலம் வேளாண் சமூகத்தை படிப்பது இப்படிப்பின் தனித்துவமான சமூக அறிவியல் கண்ணோட்டமாகும். வேளாண் குடிகளோடு சரளமாக கலந்துரையாடி, அவர்கள் பாரம்பரியமாக பின்பற்றிவரும் வேளாண் நுட்பங்கள் மற்றும் அணுகுமுறைகளை கற்றுக்கொள்ள தமிழ் வழி பயிலும் மாணாக்கர்களால் மட்டுமே முடியும். மேலும், களத்தில் விவசாயிகள் உண்மையில் எதிர் கொள்ளும் சமூகப் பிரச்னைகளை எளிதில் கண்டறிந்து ஆராய முடியும்.

புதிய வேளாண் தொழில்நுட்பங்களை பாமரமக்களும் புரிந்துகொள்ளும் வகையில் சொவ்வனே எடுத்தியம்ப தமிழ் வழி பயிலும் மாணாக்கர்களால் மட்டுமே இயலும்.

எதிர் வரும் காலத்தில், தமிழ் மொழியிலேயே வேளாண் பாடநூல்கள் கொண்டு வருவதினால், வேளாண் தகவல் களஞ்சியம் உருவாகி வேளாண் பெருமக்கள், பொதுமக்கள், ஆசிரியர்கள் மற்றும் மாணக்கர்கள் பயன் பெறுவார்கள்.